最佳女主角!?!!?!!

忽然間諗起, 有一日放左工, 返緊屋企既途中, 竟然遇上一個無必要都唔想見到既人 ~~~

當時我有諗過扮見唔到, 但奈何已經四目交投, 咁我當然要即時交足戲啦
燦爛笑容走唔甩, 又要扮到好 suprise 見到佢, 又要 chok 埋把好開心既聲去打招呼兼閒聊數句

呢 d 咁假既口面, 絕對唔係平時既我
但因為對方係另一半既朋友, 為左我既另一半, 點都要 chok 到自己好大方得體 ~~~
而家諗番起咁既自己, 都想作嘔!

雖然作嘔, 但下次再遇到同樣既情況, 都要影后上身 ~~~ 唉 .........

發完 up 瘋, 早抖也 ~~~~

2011 年

2011 年對我黎講, 暫時唔係好既一年 ~~~

1 月既時候, 我生命中最重要既人離開左我 ... 雖然明白離開對佢黎講, 絕對係一個大解脫, 但感情上點都會唔捨得 ~~~

好多時會諗, 到底而家既佢係邊? 有無掛住我地架? 係咪已經匯合左二姨 & 杜生, 一齊去左玩, 聽演唱會, 去左旅行呢? 有無接到公公?

對上一次夢中見, 應該都有個幾月前喇 ~~~ 應該都係時候返黎探我喇!!! 唔好玩 "創" 左個心呀!!!!

我會覺得, 媽媽比我更傷心 ~~~ 一年內無左個妹, 再無埋個老公, 之後無埋個老豆 ~~~

唉, 雖然明白生死有命, 但都唔使咁密呀吓嘛 ......


不過, 我好多謝亦好感恩亞丁係我身邊陪住我 ~~~ 佢絕對俾左好大精神上既支持我 ~~~ 如果無左佢係身邊, 我都唔知點算好 ~~~ 老公, 多謝你呀!!

一年有多無寫過 blog

嘩, 一年有多無寫過 blog, 真係懶得緊要呀!!

天佑我愛的人

呢個星期, 都有往靈實跑, 因為二姨既情況都唔係好樂觀 ~~~

星期二晚, 爸爸打黎話應該都係今日, 食完飯我地就過去啦 ... 去到, 情況有好轉

雖然去之前, 我已經催眠左自己, 一定要頂住, 唔好喊 ~~~
但最終, 都係忍唔住, 眼濕濕 ... 尤其聽到媽媽同二姨講 "唔使擔心, 個個都好好 ... 你老公有人會照顧架喇, 佢咁多兄弟, 唔使驚架 ... 要走就走啦"
唔聽由自何, 一聽完, 真係唔掂 ~~~

當晚返到屋企, 係面書寫左句 "是時候了嗎? 天佑我愛的人" ...
好感恩身邊有班朋友既支持 ...

同莎莎 MSN 左幾句, 佢唔問我都無野, 一問我又喊, 仲要係公司 ... 囧

我完全明白亦都希望二姨可以早日解脫, 我唔係冷血, 只係覺得佢自己都辛苦 ~~~
基本上, 佢入左靈實之後, 都無咩點開過眼, 不停咁瞓覺 ... 呢個星期仲要插喉先可以呼吸 ... 我見到佢咁樣, 我都好心 UP
我亦都知道, 一個人既離開, 並唔係真正離開 ... 只係用另一個方式係我地身邊 ...

雖然話有曬心理準備, 但到真係會來臨既一刻, 仍然覺得傷心, 仍然會喊 ~~~
不過, 我由細到大都係一個喊包 ... 只希望到時唔好喊得太勁啦 ...

身心俱疲 ~~~

我成日都想 update 個 blog, 但我而家連瞓覺都唔夠時間, 變左日日都話第日先 ~~~

不過, 我今晚返到屋企, 點都會 update 番曬既 ~~~ 加油加油, fighting!!!!

XMAS @ 上水

12/25 (FRI), 今日一早約左去二姨度開 XMAS PARTY, 順道幫二姨慶祝生日

原本我話整個蛋糕入去, 但亞郭太尋日問我整唔整, 我話整, 但佢又叫我唔好整, 佢去買喎 ... 哦, 是但啦, 佢歡喜點就點 ~~~

今日起身落街食完野, 就返屋企開工整曲奇餅, 一陣拎入去二姨度 ... 今次整左牛油味 & 綠茶味, 普通唧花曲奇 ... 不過真係唧到我手軟, D 手指好痛 ~~~

搞好曬, 入到上水都差唔多 7 點, 開始食野喇 ~~~ 不過我唔係食左太多野, 無咩胃口 ~~~ 打左一陣 wii, 9 點幾 10 點就走喇 ~~~ 先車明仔返大埔, 再車爸媽家姐返馬鞍山, 之後再車埋婆婆返牛頭角 ...

因為頭先唔係食左太多野既關係, 我就提議不如去九龍城搵野食啦, 反正都叫順路 ... 當時都已經 11 點幾, 我地搵到間食泰國野, 又有串燒既 ... 我地叫左碟通菜, 10 支串燒, 1 碟泰式春卷, 1 個椰青 & 1 支大藍妹, 埋單 $196 ... 我覺得都叫 ok 丫, d 野都幾好食 ~~~ 不過好笑既係, 我同丁丁講, 我好似個麻甩佬咁, 飲啤酒 (成支我自己飲曬), 丁丁就飲椰青 ~~~ 哈, 掉轉左喎 ...

食完返到屋企都成點鐘, 好攰呀 ~~~ 不過我地仲要成 5 點幾 6 點先瞓, 兩個掛住睇電視, wakakkakakak ~~~

Avatar 阿凡達

12/24 (THUR) 家姐一早買左飛去 Megabox IMAX 睇 3D 版 Avatar, 所以今日無返工, 自我放假一日 ...

況且尋日返左全日工, 之後再同亞 mei, jola, dada 去左黃埔 outback 食飯, 一路食飯一路傾左好多好多, 好開心好好笑 ... 食完再過番棉登徑飲野, 亞 kitt join 埋, 我地繼續傾, 傾到差唔多 2 點幾 3 點先散 ... 雖然好攰, 但好耐無聚埋一齊喇 ~~~

講番套戲, 我覺得整體上係好睇 ... 只不過中間教 Jake 既時間耐左 d, 最後大戰嗰後好似短左 d, 同埋都唔係好 3D ... 不過都 OK 呀 ... Pandora 星上既動植物好靚, 嗰棵聖樹好靚 ~~~ 家姐話佢地條辮好似 USB 插咁喎 ...

睇完去左 Spotlight 行啦諗住, 點知佢做到 12/31 就執笠喇, 好可惜 ~~~ 我地就去睇吓 d 布啦, 除左窗簾布之外, 所有布都係 $100 / 卷 ... d 布俾人 "抄" 到超超超超超超亂, 真係痴線架囉 ... 咩事 d 香港人咩事呀, 使唔使搞到 d 地方咁呀, 真係有病 ~~~

雖則係咁, 我同家姐都買左 5 卷布, 丁丁仲買左 2 包現成窗簾, 3 折左之後只係 $65 /包都唔使, 抵呀 ~~~

之後車左家姐去星悅居, 佢約左朋友開 party ... 我同丁丁就去亞里斯食 xmas eve 晚餐, 雖然唔係 D 咩名貴餐廳 / 食物, 但已經好滿足喇 ~~~ 而且我從來都唔係 D 咩虛榮既人, 最重要係身邊有個愛我既人啫 ~~~ 知足常樂嘛, 哈哈 ~~~

食飽飽就返屋企休息休息喇 ... 聽日仲要去二姨度開聖誕 PARTY 架, YEAH!!!!