XMAS @ 上水

12/25 (FRI), 今日一早約左去二姨度開 XMAS PARTY, 順道幫二姨慶祝生日

原本我話整個蛋糕入去, 但亞郭太尋日問我整唔整, 我話整, 但佢又叫我唔好整, 佢去買喎 ... 哦, 是但啦, 佢歡喜點就點 ~~~

今日起身落街食完野, 就返屋企開工整曲奇餅, 一陣拎入去二姨度 ... 今次整左牛油味 & 綠茶味, 普通唧花曲奇 ... 不過真係唧到我手軟, D 手指好痛 ~~~

搞好曬, 入到上水都差唔多 7 點, 開始食野喇 ~~~ 不過我唔係食左太多野, 無咩胃口 ~~~ 打左一陣 wii, 9 點幾 10 點就走喇 ~~~ 先車明仔返大埔, 再車爸媽家姐返馬鞍山, 之後再車埋婆婆返牛頭角 ...

因為頭先唔係食左太多野既關係, 我就提議不如去九龍城搵野食啦, 反正都叫順路 ... 當時都已經 11 點幾, 我地搵到間食泰國野, 又有串燒既 ... 我地叫左碟通菜, 10 支串燒, 1 碟泰式春卷, 1 個椰青 & 1 支大藍妹, 埋單 $196 ... 我覺得都叫 ok 丫, d 野都幾好食 ~~~ 不過好笑既係, 我同丁丁講, 我好似個麻甩佬咁, 飲啤酒 (成支我自己飲曬), 丁丁就飲椰青 ~~~ 哈, 掉轉左喎 ...

食完返到屋企都成點鐘, 好攰呀 ~~~ 不過我地仲要成 5 點幾 6 點先瞓, 兩個掛住睇電視, wakakkakakak ~~~

Avatar 阿凡達

12/24 (THUR) 家姐一早買左飛去 Megabox IMAX 睇 3D 版 Avatar, 所以今日無返工, 自我放假一日 ...

況且尋日返左全日工, 之後再同亞 mei, jola, dada 去左黃埔 outback 食飯, 一路食飯一路傾左好多好多, 好開心好好笑 ... 食完再過番棉登徑飲野, 亞 kitt join 埋, 我地繼續傾, 傾到差唔多 2 點幾 3 點先散 ... 雖然好攰, 但好耐無聚埋一齊喇 ~~~

講番套戲, 我覺得整體上係好睇 ... 只不過中間教 Jake 既時間耐左 d, 最後大戰嗰後好似短左 d, 同埋都唔係好 3D ... 不過都 OK 呀 ... Pandora 星上既動植物好靚, 嗰棵聖樹好靚 ~~~ 家姐話佢地條辮好似 USB 插咁喎 ...

睇完去左 Spotlight 行啦諗住, 點知佢做到 12/31 就執笠喇, 好可惜 ~~~ 我地就去睇吓 d 布啦, 除左窗簾布之外, 所有布都係 $100 / 卷 ... d 布俾人 "抄" 到超超超超超超亂, 真係痴線架囉 ... 咩事 d 香港人咩事呀, 使唔使搞到 d 地方咁呀, 真係有病 ~~~

雖則係咁, 我同家姐都買左 5 卷布, 丁丁仲買左 2 包現成窗簾, 3 折左之後只係 $65 /包都唔使, 抵呀 ~~~

之後車左家姐去星悅居, 佢約左朋友開 party ... 我同丁丁就去亞里斯食 xmas eve 晚餐, 雖然唔係 D 咩名貴餐廳 / 食物, 但已經好滿足喇 ~~~ 而且我從來都唔係 D 咩虛榮既人, 最重要係身邊有個愛我既人啫 ~~~ 知足常樂嘛, 哈哈 ~~~

食飽飽就返屋企休息休息喇 ... 聽日仲要去二姨度開聖誕 PARTY 架, YEAH!!!!

頹廢的一天

尋晚睇台劇 <紫玫瑰> 睇到差唔多 4 點幾 5 點, 所以今日瞓到 12 點半先起身 ... 起身又開電腦, 繼續睇 ... 真係要多謝薯仔網, hehe

睇到 3 點, 丁丁終於都起身喇, 大家梳洗過後, 落街食左個 tea, 返屋企繼續睇 ... wkakakakka ~~~

雖然我係咁煲劇, 但我都有煮飯架, 食完飯, 睇埋 <富貴門> 大結局 ... 再睇埋紫玫瑰個結局 ... 丁丁就打佢機啦當然 ~~~

UM ... 我覺得佢成套劇都唔錯, 係個結局差左 D 囉, 咁子達即係有無死到?? 小紫同子達係咪最終一齊?? 佢寫得清楚 D 會好 D 囉 ... 上網 search 過曬, 都無咩 detail 講到 ... 唔通呢套台劇唔收得??

男主角 - 黃騰浩都唔錯丫 (丁丁話佢好醜樣, 但我唔覺), 我覺得佢都型型地, 不過都係嗰句啦, 而家 d 男人既髮型係咪全部都要遮住個額頭先見得人呢 ... 唉 ~~~

女主角 - 梁文音唱歌確實好聽, 果然係星光二幫第二名, 不錯不錯 ....


咁就過左一日, 好 relax .. 好鐘意係屋企既感覺, 哈哈 ~~~

2012 + A Christmas Carol

2012 睇左都有幾星期 (我諗) ... 不過因為懶, 所以無寫 blog, hehe ~~~

2012 未上之前我好想睇 ... 但上左之後, 睇 d 影評話套戲好討好中國, 搞到我有 d 反感 ~~~ 所以都諗左好耐去唔去睇 ... 但丁丁想睇, 咁當然就要去睇啦 ...

套戲無我想像中咁悶, 而我同丁丁都唔覺有幾咁討好中國 ... 中國人多, 人工又平, 自然做得快架啦 ... d 錢又唔係中國政府出既 ... 唯一覺得討好既咪就係將西藏納入左係中國既國土囉 ...

特技真係有 d 誇張 ... 如果今套都做到咁樣, 咩都無曬咁滯, 下套末日片仲可以 sell d 咩呢??

可能現實中, 都好似套戲所講咁, 幾個大國既政府隱瞞住架喎 ... 如果真係有一日, 忽然間好似套戲咁咩都無曬 or 死曬 ... 大家覺得點呢?? 我自己睇完, 就覺得應該及時行樂啦, 盡量做 d 自己想做既野 ... 就算無世界末日, 人生苦短呀, 盡量去享受佢啦 ... 唔係到老左既時候, 無心又無力, 想做咩都無用 ... 對你所愛既人, 表達出對佢既愛啦 ... hehe



至於 A Christmas Carol, 今日同丁丁去左 the grand cinema 睇 3D 版 ... 我覺得好好睇呀 ... 雖然真係幾恐怖吓, 有幾次我都差 d 嚇到彈起 ~~~ 不過真係幾正喎 ...

我覺得又係一套想人反思既戲啦 ... 如果有時間既, 我想睇多次 ... jim carrey 真係正到不得了了呀 ~~~


有另一套我想睇既係 Julie & Julia ... 有無人得閒同我去睇呀??????????